ಉತ್ತಿಷ್ಠಭಾರತ (Uttishtabharatha) ಸುದ್ದಿ ಜಾಲತಾಣ ವರದಿ: ತೈವಾನ್ ಸುತ್ತಲೂ ಚೀನಾ ‘ಜಸ್ಟೀಸ್ ಮಿಷನ್ 2025‘ ಹೆಸರಿನಲ್ಲಿ ಭಾರಿ ಸೇನಾ ಸಮರಭ್ಯಾಸ ನಡೆಸುತ್ತಿದೆ.
ರಾಷ್ಟ್ರೀಯ ಏಕತೆ ರಕ್ಷಿಸುವ ಉದ್ದೇಶದಿಂದಲೇ ಈ ಕ್ರಮ ಕೈಗೊಂಡಿರುವುದಾಗಿ ಚೀನಾ ಹೇಳಿಕೊಂಡಿದೆ.ಆದರೆ, ತೈವಾನ್ ಇದನ್ನು ಸ್ಪಷ್ಟ ಮಿಲಿಟರಿ ಬೆದರಿಕೆ ಎಂದು ಖಂಡಿಸಿ, ಅಂತರಾಷ್ಟ್ರೀಯ ಕಾನೂನುಗಳನ್ನು ಪ್ರಶ್ನಿಸುವ ಚೀನಾದ ನಡೆಗೆ ತೀವ್ರ ವಿರೋಧ ವ್ಯಕ್ತಪಡಿಸಿದೆ.
ಇನ್ನು, ಚೀನಾ 2022ರಿಂದ ಈವರೆಗೆ ಸುಮಾರು 6 ಬಾರಿಗೆ ಈ ಭೀಕರ ಮಿಲಿಟರಿ ಡ್ರಿಲ್ ಗಳನ್ನು ಮಾಡಿದ್ದು, ಇದು ಯುಎಸ್ ಹಾಗೂ ಜಪಾನ್ ಗೆ ನೀಡುತ್ತಿರುವ ಸಂದೇಶ ಎಂದು ವಿಶ್ಲೇಷಿಸಲಾಗುತ್ತಿದೆ.
ಚೀನಾ-ತೈವಾನ್ ನಡುವಿನ ಸಂಘರ್ಷ ದಿನದಿಂದ ದಿನಕ್ಕೆ ಉಲ್ಬಣವಾಗುತ್ತಿದ್ದು, ಚೀನಾ ತೈವಾನ್ ಮೇಲೆ ತನ್ನ ಹಿಡಿತ ಸಾಧಿಸಲು ಶತ ಪ್ರಯತ್ನ ಮಾಡುತ್ತಿದೆ.
ತೈವಾನ್ಗೆ ಬೆಂಬಲವಾಗಿ ಮಾತನಾಡುವ ಪ್ರತಿಯೊಬ್ಬರ ಮೇಲೂ ನಿರ್ಬಂಧ ಹೇರುತ್ತಿದೆ, ಅಲ್ಲದೆ ತೈವಾನ್ ನ ಜಲ ಪ್ರದೇಶದಲ್ಲಿ ಮಿಲಿಟರಿ ಡ್ರಿಲ್ ಗಳನ್ನು ನಡೆಸುತ್ತಾ ಯುದ್ದಕ್ಕೆ ಕಾಲುಕೆರೆದು ನಿಲ್ಲುತ್ತಿದೆ.
ತೈವಾನ್ ನೆಲೆಯಲ್ಲಿ ಚೀನಾದ ʼಜಸ್ಟೀಸ್ ಮಿಷನ್ 2025
ಈಗ ಅದರ ಮುಂದಿನ ಹಂತವಾಗಿ ಚೀನಾ ʼಜಸ್ಟೀಸ್ ಮಿಷನ್ 2025ʼ ಎಂಬ ಧ್ಯೇಯವಾಕ್ಯದೊಂದಿಗೆ ತೈವಾನ್ ಸುತ್ತಲೂ ಸೇನಾ ಸಮರಭ್ಯಾಸ ಹಾಗೂ ಮಿಲಿಟರಿ ಕವಾಯತು ನಡೆಸುತ್ತಿದೆ.
ಈ ಸಮರಭ್ಯಾಸವು ತೈವಾನ್ನ ಸ್ವಾತಂತ್ರ್ಯದ ವಿರುದ್ಧ ಮತ್ತು ರಾಷ್ಟ್ರೀಯ ಏಕತೆಯ ರಕ್ಷಣೆಗಾಗಿ ನಡೆಸಲಾಗಿದೆ ಎಂದು ಚೀನಾ ಹೇಳಿದೆ.
ಆದರೆ ಚೀನಾದ ಈ ನಡೆ ಖಂಡಿಸಿರುವ ತೈವಾನ್ ಇದನ್ನು ಮಿಲಿಟಿರಿ ಬೆದರಿಕೆ ಎಂದು ಖಂಡಿಸಿದೆ.ಈ ಕುರಿತು ಮಾತನಾಡಿರುವ ಚೀನಾದ ಈಸ್ಟರ್ನ್ ಥಿಯೇಟರ್ ಕಮಾಂಡ್ ನ ವಕ್ತಾರ ಶಿಯಿ ಚೀನಾದ ಸೇನೆ, ನೌಕಾಪಡೆ ಮತ್ತು ರಾಕೆಟ್ ಘಟಕಗಳು ತೈವಾನ್ ಸುತ್ತಲೂ ದೊಡ್ಡ ಪ್ರಮಾಣದ ಮಿಲಿಟರಿ ಡ್ರಿಲ್ ಅನ್ನು ಸೋಮವಾರದಿಂದ ಆರಂಭಿಸಿವೆ.
ಈ ಪ್ರದೇಶದಲ್ಲಿ ಉದ್ವಿಗ್ನತೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದ್ದು, ತೈವಾನ್ ಸ್ವಾತಂತ್ರ್ಯ ಪ್ರತ್ಯೇಕತಾವಾದಿ ಶಕ್ತಿಗಳು ಮತ್ತು ಬಾಹ್ಯ ಹಸ್ತಕ್ಷೇಪ ಶಕ್ತಿಗಳಿಗೆ ಗಂಭೀರ ಎಚ್ಚರಿಕೆಯಾಗಿದೆ.
ರಾಷ್ಟ್ರೀಯ ಸಾರ್ವಭೌಮತ್ವವನ್ನು ರಕ್ಷಿಸಲು ಮತ್ತು ರಾಷ್ಟ್ರೀಯ ಏಕತೆಯನ್ನು ಕಾಪಾಡಲು ಕಾನೂನುಬದ್ಧ ಮತ್ತು ಅಗತ್ಯವಾದ ಕ್ರಮವಾಗಿದೆ ಎಂದು ತಿಳಿಸಿದ್ದಾರೆ.
ಅಲ್ಲದೆ, “ಈ ಕವಾಯತುಗಳನ್ನು ತೈವಾನ್ ನ 5 ಸಮುದ್ರ ಪ್ರದೇಶಗಳಲ್ಲಿ ಮಾಡಲಾಗುತ್ತಿದ್ದು, ಇದರಲ್ಲಿ ತೈವಾನ್ ಜಲಸಂಧಿ , ತೈವಾನ್ನ ಉತ್ತರ, ನೈಋುತ್ಯ, ಆಗ್ನೇಯ ಮತ್ತು ಪೂರ್ವ ಭಾಗಗಳು ಸೇರಿವೆ.
ಇದರ ಪ್ರಕಾರ, ಸ್ಥಳೀಯ ಸಮಯ ಬೆಳ್ಳಿಗೆ 8 ಗಂಟೆಯಿಂದ ಸುಮಾರು 10 ಗಂಟೆಗಳ ಕಾಲ ಈ ಸಮುದ್ರಪ್ರದೇಶಗಳು ಹಾಗೂ ವಾಯುಪ್ರದೇಶಗಳ ಮೇಲೆ ನಿರ್ಬಂಧ ವಿಧಿಸಲಾಗಿದೆ ಎಂದು ತಿಳಿಸಿದ್ದಾರೆ.
ಈ ಡ್ರಿಲ್ ಗಳು “ಸಮುದ್ರ ಮತ್ತು ವಾಯು ಯುದ್ಧ ಸನ್ನದ್ಧತೆಯ ಗಸ್ತುಗಳಲ್ಲಿ ತರಬೇತಿ, ಸಮಗ್ರ ನಿಯಂತ್ರಣವನ್ನು ವಶಪಡಿಸಿಕೊಳ್ಳುವುದು ಹಾಗೂ ಪ್ರಮುಖ ಬಂದರುಗಳು ಮತ್ತು ನಿರ್ಣಾಯಕ ಪ್ರದೇಶಗಳ ದಿಗ್ಬಂಧನ ಮತ್ತು ನಿಯಂತ್ರಣಗಳ ಮೇಲೆ ಕೇಂದ್ರಿಕರಿಸಿವೆ ಎಂದು ತಿಳಿಸಿದ್ದಾರೆ.
ಚೀನಾ ನಡೆಗೆ ತೈವಾನ್ ಖಂಡನೆ
ಇನ್ನು, ಚೀನಾದ ಈ ನಡೆಯನ್ನು ತೈವಾನ್ ಸರ್ಕಾರ ಖಂಡಿಸಿದೆ. ಈ ಕುರಿತು ಹೇಳಿಕೆ ನೀಡಿ ತೈವಾನ್ನ ಅಧ್ಯಕ್ಷರ ವಕ್ತಾರ ಕರೆನ್ ಕುಒ “ಚೀನಾದ ಈ ಮಿಲಿಟರಿ ಡ್ರಿಲ್ಗಳು ತೈವಾನ್ ಜಲಸಂಧಿ ಮತ್ತು ಇಂಡೋ-ಪೆಸಿಫಿಕ್ ಪ್ರದೇಶದ ಭದ್ರತೆ ಮತ್ತು ಸ್ಥಿರತೆಯ ಸ್ಥಿತಿಯನ್ನು ಬಹಿರಂಗವಾಗಿ ದುರ್ಬಲಗೊಳಿಸುವಂತಿದೆ ಮತ್ತು ಅಂತರರಾಷ್ಟ್ರೀಯ ಕಾನೂನುಗಳು ಮತ್ತು ಆದೇಶವನ್ನು ಬಹಿರಂಗವಾಗಿ ಪ್ರಶ್ನಿಸುತ್ತಿದೆ” ಎಂದು ಕಿಡಿಕಾರಿದ್ದಾರೆ.
“ಅಂತಾರಾಷ್ಟ್ರೀಯ ನಿಯಮಗಳನ್ನು ಲೆಕ್ಕಿಸದೆ ಮತ್ತು ನೆರೆಯ ದೇಶಗಳಿಗೆ ಬೆದರಿಕೆ ಹಾಕಲು ಮಿಲಿಟರಿ ಬೆದರಿಕೆಯನ್ನು ಬಳಸುವ ಚೀನಾ ಅಧಿಕಾರಿಗಳ ನಿರ್ಲಕ್ಷ್ಯವನ್ನು ನಾವು ಬಲವಾಗಿ ಖಂಡಿಸುತ್ತೇವೆ.
ಅಲ್ಲದೆ, ಈ ಕ್ರಮಗಳಿಗೆ ಪ್ರತಿಕ್ರಿಯೆಯಾಗಿ ಮಿಲಿಟರಿ ಕಾರ್ಯಚರಣೆ ನಡೆಯುತ್ತಿರುವ ಪ್ರದೇಶದ ಸುತ್ತಲು ತೈವಾನ್ ಸೂಕ್ತ ಸಶಸ್ತ್ರಪಡೆಗಳನ್ನು ನಿಯೋಜಿಸಿದೆ” ಎಂದು ತಿಳಿಸಿದ್ದಾರೆ.
2022ರಿಂದ ಈವರೆಗೆ 6 ಬಾರಿ ಮಿಲಿಟರಿ ಕಾರ್ಯಚರಣೆ
ಚೀನಾ ತೈವಾನ್ ಮೇಲೆ ನಡೆಸುತ್ತಿರುವ ಈ ಮಿಲಿಟರಿ ಕಾರ್ಯಾಚರಣೆ 2022ರಿಂದ ಈವರೆಗೆ ನಡೆಸಿರುವ 6ನೇ ಸುತ್ತಿನ ಸಮರಾಭ್ಯಾಸವಾಗಿದ್ದು, 2022ರಲ್ಲಿ ಅಂದಿನ ಅಮೆರಿಕಾದ ಹೌಸ್ ಸ್ಪೀಕರ್ ನ್ಯಾನ್ಸಿ ಪೆಲೋಸಿ ತೈವಾನ್ ಗೆ ಭೇಟಿ ನೀಡಿದ ಮೇಲೆ ಚೀನಾ ಇದನ್ನು ವಿರೋಧಿಸಿ ಕಾರ್ಯಚರಣೆ ನಡೆಸಿತ್ತು.
ಅಂದಿನಿಂದ ತೈವಾನ್ ಜಲಸಂಧಿಯಲ್ಲಿ ತನ್ನ ಮಿಲಿಟಿರಿ ಕಾರ್ಯಚರಣೆ ಹೆಚ್ಚಾಗಿಸಿದೆ. ಅಷ್ಟೇ ಅಲ್ಲದೆ, ಇತ್ತೀಚೆಗೆ ಜಪಾನ್ ಪ್ರಧಾನಿ ಸನೆ ತಕೈಚಿ ತೈವಾನ್ ಮೇಲಿನ ಚೀನಾದ ಸಂಭಾವ್ಯ ಸಶಸ್ತ್ರ ದಾಳಿಗೆ ಜಪಾನ್ ಮಿಲಿಟರಿ ಪ್ರತಿಕ್ರಿಯೆ ನೀಡಬಹುದು ಎಂಬ ಹೇಳಿಕೆಯಿಂದ ಚೀನಾ ಇನ್ನಷ್ಟು ಕೆರಳಿದ್ದು, ಜಪಾನ್ ಮೇಲೆ ನಿರ್ಬಂಧ ಹೇರುವ ಮೂಲಕ ಸೈಡ್ ಲೈನ್ ಯುದ್ದ ಆರಂಭಸಿತ್ತು.
ಅಲ್ಲದೆ, ಕಳೆದ ವಾರದಲ್ಲಿ ಅಮೆರಿಕಾ ತೈವಾನ್ ಗೆ ಬರೋಬ್ಬರಿ 10ಶತಕೋಟಿ ಡಾಲರ್ಗಳಿಗೂ ಅಧಿಕ ಮೌಲ್ಯದ ಶಸ್ತ್ರಾಸ್ತ್ರ ಮಾರಾಟ ಮಾಡುವುದಾಗಿ ಘೋಷಿಸಿದ ನಂತರ ಯುಎಸ್ ಮಿಲಿಟರಿ ಕಂಪನಿಗಳಿಗೆ ಬ್ಯಾನ್ ಮೂಲಕ ಎಚ್ಚರಿಕೆ ನೀಡಿತ್ತು.
ಈ ಬೆನ್ನಲ್ಲೇ, ಈ ಜಪಾನ್ , ಅಮೆರಿಕಾ ಹಾಗೂ ತೈವಾನ್ ಬೆಂಬಲಿಸುವ ಎಲ್ಲ ದೇಶಗಳಿಗೆ ಸಂದೇಶ ನೀಡುವಂತೆ ಚೀನಾ ಮಿಲಿಟರಿ ಕಾರ್ಯಚರಣೆ ಚುರುಕುಗೊಳಿಸಿದ್ದು, ತೈವಾನ್ ಮೇಲೆ ಚೀನಾ ಸಾರ್ವಭೌಮತ್ವ ಸಾಧಿಸುವುದನ್ನು ಯಾರಿಂದಲೂ ತಡೆಯಲು ಸಾಧ್ಯವಿಲ್ಲ ಎಂದು ಖಡಕ್ ಎಚ್ಚರಿಕೆ ನೀಡುತ್ತಿದೆ.
