ರಷ್ಯಾ ಅಧ್ಯಕ್ಷ ಪುಟಿನ್ ನಿವಾಸದ ಮೇಲೆ ಡ್ರೋನ್ ದಾಳಿ ಆರೋಪ: ಇದು ರಷ್ಯಾದ ಹಸಿ ಸುಳ್ಳು ಎಂದ ಉಕ್ರೇನ್ !

ರಷ್ಯಾದಲ್ಲಿ ಅಧ್ಯಕ್ಷರ ನಿವಾಸದ ಮೇಲೆ ಉಕ್ರೇನ್ ಡ್ರೋನ್ ದಾಳಿ ನಡೆಸಿದೆ ಎಂಬ ರಷ್ಯಾದ ಆರೋಪವನ್ನು ಉಕ್ರೇನ್ ಅಧ್ಯಕ್ಷ ಝೆಲೆನ್ಸ್ಕಿ ತಳ್ಳಿಹಾಕಿದ್ದಾರೆ. ಶಾಂತಿ ಮಾತುಕತೆಗಳನ್ನು ಹಳಿತಪ್ಪಿಸಲು ಮಾಸ್ಕೋ ಇಂತಹ ಸುಳ್ಳು ಸುದ್ದಿ ಹರಡುತ್ತಿದೆ ಎಂದು ಅವರು ಕಿಡಿಕಾರಿದ್ದಾರೆ.

ಈ ಘಟನೆ ಟ್ರಂಪ್ ಜೊತೆಗಿನ ಝೆಲೆನ್ಸ್ಕಿ ಮಾತುಕತೆಯ ಬೆನ್ನಲ್ಲೇ ನಡೆದಿದೆ. ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರ ಅಧಿಕೃತ ನಿವಾಸದ ಮೇಲೆ ಉಕ್ರೇನ್ ಡ್ರೋನ್ ದಾಳಿ ನಡೆಸಿದೆ ಎಂಬ ರಷ್ಯಾದ ಆರೋಪವನ್ನು ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ತೀವ್ರವಾಗಿ ನಿರಾಕರಿಸಿದ್ದಾರೆ.

ಶಾಂತಿ ಮಾತುಕತೆಗಳನ್ನು ಹಳಿತಪ್ಪಿಸಲು ಮಾಸ್ಕೋ ಇಂತಹ ಸುಳ್ಳು ಸುದ್ದಿಗಳನ್ನು ಹರಡುತ್ತಿದೆ ಎಂದು ಅವರು ಕಿಡಿಕಾರಿದ್ದಾರೆ.

ರಷ್ಯಾದ ಆರೋಪವೇನು?

ರಷ್ಯಾದ ವಿದೇಶಾಂಗ ಸಚಿವ ಸೆರ್ಗೆಯ್ ಲಾವ್ರೊವ್ ನೀಡಿರುವ ಹೇಳಿಕೆಯ ಪ್ರಕಾರ, ವಾಯುವ್ಯ ರಷ್ಯಾದ ನವ್ಗೊರೊಡ್ ಪ್ರದೇಶದಲ್ಲಿರುವ ಪುಟಿನ್ ಅವರ ನಿವಾಸದ ಮೇಲೆ ಉಕ್ರೇನ್ ರಾತ್ರೋರಾತ್ರಿ 91 ದೂರಗಾಮಿ ಡ್ರೋನ್‌ಗಳ ಮೂಲಕ ದಾಳಿ ನಡೆಸಿದೆ.

ಆದರೆ, ರಷ್ಯಾದ ವಾಯು ರಕ್ಷಣಾ ವ್ಯವಸ್ಥೆಯು ಈ ಎಲ್ಲಾ ಡ್ರೋನ್‌ಗಳನ್ನು ಹೊಡೆದುರುಳಿಸಿದೆ ಮತ್ತು ಯಾವುದೇ ಹಾನಿ ಸಂಭವಿಸಿಲ್ಲ ಎಂದು ಅವರು ತಿಳಿಸಿದ್ದಾರೆ. ಈ ಘಟನೆಯ ಹಿನ್ನೆಲೆಯಲ್ಲಿ ರಷ್ಯಾ ತನ್ನ ಶಾಂತಿ ಮಾತುಕತೆಯ ನಿಲುವನ್ನು ಮರುಪರಿಶೀಲಿಸಲಿದೆ ಎಂದು ಲಾವ್ರೊವ್ ಎಚ್ಚರಿಸಿದ್ದಾರೆ.

ಝೆಲೆನ್ಸ್ಕಿ ಪ್ರತ್ಯುತ್ತರ:

ಈ ಆರೋಪಗಳನ್ನು ರಷ್ಯಾ ಸುಳ್ಳು ಹೇಳುತ್ತಿದೆ ಎಂದು ಝೆಲೆನ್ಸ್ಕಿ ತಳ್ಳಿಹಾಕಿದ್ದಾರೆ. ಉಕ್ರೇನ್ ಮೇಲೆ ಸತತ ದಾಳಿಗಳನ್ನು ನಡೆಸಲು ಕ್ರೆಮ್ಲಿನ್ ಇಂತಹ ನೆಪಗಳನ್ನು ಸೃಷ್ಟಿಸುತ್ತಿದೆ ಎಂದು ಅವರು ದೂರಿದ್ದಾರೆ. “ಈ ಸಮಯದಲ್ಲಿ ಜಗತ್ತು ಮೌನವಾಗಿರಬಾರದು. ಶಾಂತಿ ಸ್ಥಾಪನೆಯ ಪ್ರಯತ್ನಗಳನ್ನು ರಷ್ಯಾ ಹಾಳುಮಾಡಲು ನಾವು ಬಿಡಬಾರದು” ಎಂದು ಝೆಲೆನ್ಸ್ಕಿ ಎಕ್ಸ್ (X) ನಲ್ಲಿ ಬರೆದುಕೊಂಡಿದ್ದಾರೆ.

ಟ್ರಂಪ್ ಜೊತೆಗಿನ ಮಾತುಕತೆ ಮತ್ತು ಶಾಂತಿ ಯೋಜನೆ:

ಫ್ಲೋರಿಡಾದಲ್ಲಿ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಝೆಲೆನ್ಸ್ಕಿ ಭೇಟಿಯಾಗಿ ಯುದ್ಧ ಕೊನೆಗೊಳಿಸುವ ಕುರಿತು ಚರ್ಚಿಸಿದ ಬೆನ್ನಲ್ಲೇ ಈ ಬೆಳವಣಿಗೆ ನಡೆದಿದೆ. 2026ರ ವೇಳೆಗೆ ಯುದ್ಧವನ್ನು ಕೊನೆಗೊಳಿಸುವ ಸಾಧ್ಯತೆಯಿದೆ ಎಂದು ಝೆಲೆನ್ಸ್ಕಿ ಅಂತರಾಷ್ಟ್ರೀಯ ಮಾಧ್ಯಮಕ್ಕೆ ತಿಳಿಸಿದ್ದಾರೆ.

ಉಕ್ರೇನ್‌ಗೆ ಅಮೆರಿಕವು 15 ವರ್ಷಗಳ ಭದ್ರತಾ ಖಾತರಿಯನ್ನು ನೀಡಲು ಮುಂದಾಗಿದ್ದು, ಈ ಒಪ್ಪಂದವು ಶೇಕಡಾ 95 ರಷ್ಟು ಪೂರ್ಣಗೊಂಡಿದೆ ಎಂದು ಟ್ರಂಪ್ ಹೇಳಿದ್ದಾರೆ.

ಆದರೆ, ರಷ್ಯಾದ ವಶದಲ್ಲಿರುವ ಡಾನ್‌ಬಾಸ್ ಪ್ರದೇಶ ಮತ್ತು ಜಪೋರಿಝಿಯಾ ಪರಮಾಣು ಸ್ಥಾವರದಂತಹ ಪ್ರಾದೇಶಿಕ ವಿಷಯಗಳು ಇನ್ನೂ ಬಗೆಹರಿಯದ ದೊಡ್ಡ ಸವಾಲುಗಳಾಗಿ ಉಳಿದಿವೆ

ಟ್ರಂಪ್ ಮತ್ತು ಪುಟಿನ್ ದೂರವಾಣಿ ಕರೆ:

ಈ ಘಟನೆಯ ನಂತರ ಪುಟಿನ್ ಅವರು ಟ್ರಂಪ್ ಅವರೊಂದಿಗೆ ದೂರವಾಣಿ ಮೂಲಕ ಮಾತನಾಡಿದ್ದಾರೆ. ಉಕ್ರೇನ್‌ನ ಈ ದಾಳಿಯನ್ನು “ಹುಚ್ಚುತನದ ಕ್ರಮ” ಎಂದು ದೂರಿದ್ದಾರೆ.

ಇದಕ್ಕೆ ಟ್ರಂಪ್ ಆಘಾತ ಮತ್ತು ಆಕ್ರೋಶ ವ್ಯಕ್ತಪಡಿಸಿದ್ದಾರೆ ಎಂದು ಪುಟಿನ್ ಅವರ ಸಹಾಯಕ ಯೂರಿ ಉಷಾಕೋವ್ ಹೇಳಿದ್ದಾರೆ.

ಪತ್ರಿಕಾಗೋಷ್ಠಿಯಲ್ಲಿ ಈ ಬಗ್ಗೆ ಪ್ರತಿಕ್ರಿಯಿಸಿದ ಟ್ರಂಪ್, “ಪುಟಿನ್ ನನಗೆ ಈ ಮಾಹಿತಿ ನೀಡಿದ್ದಾರೆ, ನಾವು ಇದರ ಬಗ್ಗೆ ಸತ್ಯಾಸತ್ಯತೆ ತಿಳಿಯಲಿದ್ದೇವೆ.

ಬಹುಶಃ ಇಂತಹ ದಾಳಿ ನಡೆದಿಲ್ಲದಿರುವ ಸಾಧ್ಯತೆಯೂ ಇದೆ” ಎಂದು ಹೇಳುವ ಮೂಲಕ ಸ್ವಲ್ಪ ಸಂಶಯ ವ್ಯಕ್ತಪಡಿಸಿದ್ದಾರೆ. ಪ್ರಸ್ತುತ, ಉಕ್ರೇನ್‌ನ ಡೊನೆಟ್ಸ್ಕ್ ಪ್ರದೇಶದ ಶೇ. 75 ರಷ್ಟು ಮತ್ತು ಲುಹಾನ್ಸ್ಕ್ ಪ್ರದೇಶದ ಶೇ. 99 ರಷ್ಟು ಭಾಗ ರಷ್ಯಾದ ನಿಯಂತ್ರಣದಲ್ಲಿದೆ